Brynjulf Jung Tjønn Maria Kleppe Vihovde / Cappelen Damm
Brynjulf Jung Tjønn er festspeldiktar i 2026
Brynjulf Jung Tjønn er festspeldiktar når Festspela går av stabelen 11.–14. juni2026. Temaet for Festspela 2026 er «Lys og mørke».
«Lys og mørke» er meir enn kontrastar – det speglar korleis vi forstår verda rundt oss. I ei tid prega av klimaendringar, krig, teknologisk utvikling og sosiale skiljelinjer, er temaet meir aktuelt enn nokon gong. Festspeltemaet finn også inspirasjon i Brynjulf Jung Tjønn si bok «Alt det lyse og alt det mørke» (2017).
Festspela 2026 samlar aktuelle forfattarar, føredragshaldarar og artistar som kastar lys over det som rører seg i samfunnet, og som vågar å gå inn i det mørke for å finne innsikt og håp. Gjennom litteratur, kunst, samtalar og musikk inviterer vi til refleksjon, opplevingar og nye perspektiv.
Brynjulf Jung Tjønn er ein kritikarrost og allsidig forfattar som har gitt ut bøker for barn, ungdom og vaksne. Tjønn skriv poetisk og innsiktsfullt om sterke tema som rasisme og familiekriser. Han nyttar nyskapande bilete i kombinasjon med eit enkelt og direkte språk. Som lesar kjenner ein tekstane hans på kroppen. Tjønn fekk Brageprisen for beste barne- og ungdomsbok for «Så vakker du» er i 2013 og Kritikerprisen og Nynorsk litteraturpris i 2022 for diktboka «Kvit, norsk mann».
Boka «Kvit, norsk mann» tar for seg rasisme og korleis det er å vekse opp som utanlandsadoptert i Noreg. Diktsamlinga «Norsk kjærleik» (2024) følgjer opp tematikken frå «Kvit, norsk mann», og i boka formidlarTjønn tankane sine om Noreg og det norske.
Du kan lese meir om festspeldiktaren 2026 på SNL.no.
