Litterær konsert og boklansering - Flygelet ved fjorden

Opplev ein roman i konsertformat.

I haust kjem Lars Amund Vaage ut med romanen Flygelet ved fjorden. Tittelen peikar mot den sentrale plassen musikken har i forfattarskapen hans, og også i denne romanen er det eit musikalsk og poetisk språk mellom permane. Saman med musikar Geir Hjorthol inviterer han til å oppleve romanen i konsertformat. 

Forfattaren presenterer romanen etterfuglt av ein litterær konsert. Han les utdrag frå romanen, medan Hjorthol fangar miljø og stemningar musikalsk, gjennom varierte speleteknikkar supplert med elektronisk prosessering og sampling. Musikken er elektro-akustisk og vil i stor grad bli improvisert fram i dialog med utdraga. Etter konserten signerer forfattaren bøker i kafeen.

Flygelet ved fjorden er den tredje boka i ein trilogi, der dei to første bøkene har titlane Det uferdige huset (2020) og Mjølketid (2023).  

Romanen er djupt personleg, fininnstilt, klangfull, rytmisk og dvelande. Lars Amund Vaage handsamar eit stoff som har vore med i bakgrunnen i alt han har skrive før, men som han først no løftar opp i lyset. 

Lars Amund Vaage har ein omfattande forfattarskap bak seg: fjorten romanar, fem diktbøker, to novellesamlingar, ei essaybok, eitt skodespel og to barnebøker. Han har motteke ei rekkje litterære prisar og har vore nominert til Nordisk råds litteraturpris to gonger, sist for romanen Det uferdige huset (2020). Vaage er sjølv ein dyktig pianist og brukar dei musikalske kunnskapane og erfaringane i bøkene sine.