Leif Nyland er årets festspelkunstnar 

I måleria sine utforskar Nyland landskap og arkitektoniske element. Gjennom abstraksjonar, kontrastar og ein rik fargepalett fangar han stemningsfulle og nærast filmatiske augneblink på lerretet. Lys og skugge står sentralt i arbeida og knyter kunsten tett opp mot årets festivaltema.  

Ifølgje Nyland sjølv er det kontrastane som byggjer spenninga, augneblinkane og får oss til å stoppe.    

– Lyset og skuggane fortel oss om det evige, men også om augneblinkane vi plutseleg er til stades i, seier han.    

– Dei blå måleria nærmar seg eit slags mørke, men ikkje utan at det er lys der, medan det i andre måleri er lyset som fortel historia.  

Mange av motiva vi får oppleve under Festspela, inneheld eit hus eller berre ein del av ein vegg.  

– Dette er stader eg har vakse opp med, forklarer Nyland. – Men eg forstod ikkje kva dei prøvde å fortelje meg, før eg faktisk byrja å måle. Det handlar til slutt om å setje i scene dei augneblinkane eg trur vi berre har hatt ei kjensle av tidlegare.  

Leif Nyland kjem frå Vikane utanfor Fredrikstad. Han er utdanna ved Kunsthøgskolen i Oslo med ein master i visuell kunst og bachelor i grafikk.  

– Det å få vere festspelkunstnar er stort, men å bli beden om å representere temaet «Lys og mørke» er endå større! Når biletkunsten, musikken og litteraturen møtest, blir det kraftfullt. Og med den fantastiske ramma som Festspela set, så blir det utruleg spennande å få vise kunsten sin i Ørsta, seier Nyland.  

Valet av festspelkunstnar skjer i tett dialog mellom Festspel-arrangørane og Volda og Ørsta kunstlag, som også er vertskap for festspelutstillinga.  

– Leif Nyland har eit sterkt og spennande uttrykk som vi ser fram til å vise publikum. Vi gler oss stort til festspelutstillinga og er glade for å føre vidare denne tradisjonen, seier leiaren i Volda og Ørsta kunstlag, Jan Henning Egset. 

Festspela har lang tradisjon for samarbeid med lokale aktørar, noko som spreier festivalstemninga vidare frå Aasentunet til fleire arenaer og arrangement i Ørsta og Volda sentrum.   

– Samarbeidet om festspelutstillinga er både kjært og spennande, seier fungerande forskings- og samlingsleiar ved Nynorsk kultursentrum, Stina Aasen Lødemel. – Saman løftar vi fram breidda i kunst- og kulturfeltet og skapar rom for å utforske samspelet mellom språk, litteratur, musikk og biletkunst.