Ny podkast vil inspirere til leseglede blant born

–  Avdeling T er namnet på ein ny podkast for og med born produsert av Nynorsk kultursentrum. Gjennom fire episodar møter me mystiske tåkefenomen og kaotiske bokunivers der også forfattarane sjølve dukkar opp, fortel formidlar i Nynorsk kultursentrum Anja H. Svingen. Målgruppa for podkasten er unge lyttarar i alderen 6–12 år. Nye episodar kjem kvar veke i fellesferien på Spotify, Apple podkast og andre strøymetenester.

I denne podkasten vert lyttarane kjende med Avdeling T, ei hemmeleg avdeling i regjeringa, som berre statsministeren og få andre i landet vårt veit om. Ho jobbar for at bokverder ikkje kjem ut av kontroll. For det ingen veit, er at alt forfattarar skriv faktisk vert til verkelegheit. Av og til kan historier blande seg saman, og då oppstår det ulike tåkefenomen. Då må Meister T og agentane hennar rykke ut for å ordne opp. 

Agentane er spela av born i alderen 6–13 år. Det er nye agentar, forfattarar og litterære univers i kvar episode. Forfattarane Ingunn Thon, Thoralf Fagertun og Ida Eva Neverdahl er med i denne sesongen. Podkasten er utvikla og produsert av Anja H. Svingen og Mari Tveiti i Nynorsk kultursentrum. –  Det var så artig å få vere med på dette nye podkastkonseptet. Eg heiar på Anja og Mari sitt arbeid, og håpar alle born vil besøke det særeigne, levande universet dei to har skapt, seier forfattar Ingunn Thon.  

Medan borna får morosam underhaldning på øyrane ligg det eit større mål i botn: Avdeling T vil nå ut til alle born – både til dei som slit med lesing, og til dei som allereie les mykje. 
– Med utgangspunkt i eit spennande nytt konsept med litteratur i fokus ønskjer me å gjere nynorske barnebøker lettare tilgjengelege for unge lesarar – utan at det kjennest som læringspress, seier Anja H. Svingen.

Born og unge i Noreg les mindre enn før, særleg på fritida. Undersøkingar viser at færre born les for eiga glede, og leseferdigheitene går ned. Den internasjonale leseundersøkinga PIRLS 2021 viste eit markant fall i leseferdigheitene hjå norske 10-åringar. Regjeringa sin leselyststrategi for 2024–2030 peikar også på ei tydeleg utvikling som viser at digitale plattformar påverkar born og unge sine lesevanar negativt. – Med Avdeling T ønskjer me i Nynorsk kultursentrum derfor å gi ei lydoppleving som lokkar målgruppa til å plukke opp ei bok og begynne å lese på eiga hand. Lyd og forteljingar kan gi nye inngangar til fantasi, språk og litteratur. Me håpar denne podkasten kan vere eit springbrett for born som ikkje les så mykje frå før, seier Mari Tveiti, digitalformidlar i Nynorsk kultursentrum. 

 

Høyr podkasten her

• Avdeling T