UTSYN | innsyn

UTSYN | innsyn – ein kreativ verkstad som tek utgangspunkt i dei to dansefilmane UTSYN og UTSYN | samsyn av Einy Åm Sparks og i diktet DAGANE av Hilde Myklebust. Verkstaden gir elevane eit innsyn i samanhengen mellom språk, rørsle og rom. Deltakarane får bevege seg sjølvstendig og saman med andre, arbeide med dikt og observere dans både i rommet og på film. Til slutt får dei også lage sin eigen film i fellesskap, leidd av formidlarane.

Det finst mange måtar å uttrykkje seg på gjennom ord og rørsle. I denne produksjonen skapar vi eit rom der elevane får ein sjanse til å bli meir bevisste på dans og språk gjennom ei kreativ fysisk utforsking av ord, eigne rørsler og observasjon av dansefilm.

Utgangspunktet for prosjektet er dansefilmane UTSYN og UTSYN | samsyn, skapte av koreograf og dansekunstnar Einy Åm Sparks i samarbeid med Nynorsk kultursentrum. Dei to filmane er inspirerte av arkitekturen til Sverre Fehn i Aasentunet, som tek utgangspunkt i Ivar Aasens liv og verksemd. Gjennom ei veksling av dans og daglegdagse rørsler utforskar dansarane ulike krokar og rom både inne i og utanfor bygget, og ved hjelp av ulike kameravinklar viser filmane bygget frå nye perspektiv. Dette dannar bakteppet for tema som korleis skriftspråket kan vere med på å opne for nye univers av kreativitet og kunnskap, og det å stå saman i fellesskap med alle våre ulikskapar og ulike perspektiv.

I løpet av verkstaden vil elevane vil bli utfordra til å ta eigne val, samarbeide og finne kreative løysingar. Gjennom ulike oppgåver endar vi til slutt opp med å reflektere den individuelle kreativiteten og kvarandre i ein felles dans. Dansen blir filma av ein av utøvarane og overført til projektoren, og vi avsluttar verkstaden med ei visning av dansefilmen som vi no har skapt i fellesskap.