Bøker og berekraft

Marit O Kaldhol, Guri Sørumgård Botheim og Knut Ivar Bjørlykhaug i samtale med Anne Natvig.  

Er du interessert i økologi, natur, litteratur eller kva rolle klima kan spele for menneske si psykiske helse? Då er dette eit arrangement du ikkje vil gå glipp av!  

I denne samtalen samlar vi tre etablerte stemmer som på ulikt vis utforskar forholdet mellom mennesket, naturen og litteraturen. Naturtap og klimaendringar er ei av vår tids største utfordringar. Korleis kan litteraturen brukast for å møte klimaangst og økosorg? 

Marit O Kaldhol er årets festspeldiktar. Ho debuterte i 1983 med diktsamlinga «Lattermilde laken» og har sidan skrive både romanar, noveller og diktsamlingar for born og vaksne. Ho er kjend for å ikkje sky unna vanskelege tema i bøkene sine. Kaldhol har fått fleire nasjonale og internasjonale prisar, mellom anna for barneboka «Farvel, Rune» (1986). 

Guri Sørumgård Botheim debuterte med romanen «Ramstein pensionat» i 2009. I 2016 gav ho ut «Heime mellom istidene», ei diktsamling om kva det vil seie å kjenne seg heime, om ansvar og om erindring som tinar fram. Aktuelle «Høgfjellsmeldinga» (2024) vidarefører tema frå diktsamlinga, men knyter seg nærare eit dagsaktuelt konfliktstoff: Kven har rett til å bruke fjellet og til kva? 

Knut Ivar Bjørlykhaug er frå Nordvestlandet og bur på Nesodden. Han har doktorgrad i sosialt arbeid og sosialpolitikk. Bjørlykhaug er lærar og forskar ved VID vitskapelege høgskule. Han har dei siste åra forska på kjensler for naturen og  rettferdsarbeid, og reiser til Runde Miljøsenter minst fire gongar i året. 

Anne Natvig er førstekonservator ved Nynorsk kultursentrum, musea for skriftkultur, og skal leie samtalen.

• Årets festspelprogram