Fire favorittar frå Symra. Storverket til forfattaren Ivar Aasen

I kveld får du oppleve fire ulike røyster framføre sitt favorittdikt frå Symra og høyre dei dele tankane sine om desse dikta: årets festspeldiktar Marit O Kaldhol, forfattar Gunnhild Øyehaug, kulturredaktør Jens Kihl og konservator Stein Arnold Hevrøy, i  samtale med musikar Runar Gudnason.

Det kom ut tre utgåver av «Symra» i Ivar Aasen si levetid og i  2025 er det 150 år sidan diktsamlinga fekk si endelege form i «Symra. Tvo Tylfter med Visor og Rim» (1875). Det Norske Samlaget gir i år ut «Symra» på nytt med forord av Runar Gudnason.

Symra eller kvitveisen er vårblomen som varslar sommar. Diktsamlinga «Symra», som Ivar Aasen gav ut anonymt i 1863, bar òg bod om ein nasjonal sommar i åndslivet og ein ny litteratur på det nye skriftspråket nynorsk. Her er dikt om naturen, arbeid, kjærleik, klokskap, sanning, tilgjersle, tru og von. Tekstane kunne syngjast, og mange var dikta til kjende tonar. Den mest kjende songen i «Symra» er «Nordmannen», ein av dei få songane nordmenn flest kan utanboks.

Runar Gudnason er musikar, låtskrivar, tekstforfattar og regissør. Han er velkjend frå hiphop-gruppa Side Brok frå Ørsta. I 2023 hadde Gudnason premiere på dokumentaren «Eg har ord» (2023), der han reiser tilbake i tid for å finne ut kvifor han sjølv vart rappar. Gudnason har skriv forordet i nyutgjevinga av Symra.

Marit O Kaldhol er årets festspeldiktar. Ho debuterte i 1983 med diktsamlinga “Lattermilde laken” og har sidan skrive både romanar, noveller og diktsamlingar for barn og vaksne. Kaldhol er kjend for sitt knappe språk og beskjedne bruk av stilgrep.

Gunnhild Øyehaug er forfattar, litteraturkritikar og lærar ved Skrivekunstakademiet i Hordaland. Forfattarskapen hennar har hausta gode kritikkar og fleire gjæve prisar i ei årrekkje. Øyehaug var festspeldiktar i 2015.

Jens Kihl er målmann, journalist og forfattar. Han har vore kulturredaktør i Bergens Tidende sidan 2021 og fekk Kulturdepartementets nynorskpris for journalistar i 2017. Han har tidlegare skrive bøkene «Dette er også Noreg. Kommunal feelgood» (2019) og «Liv Signe Navarsete. Eg veit kva eg snakkar om!» (2022). I år er han aktuell med boka «Blakk», som er del av bokserien «Norsk Røyndom» frå Samlaget.

Stein Arnold Hevrøy er konservator i Nynorsk kultursentrum og har arbeidsstad ved Haugesenteret i Ulvik. Med bakgrunn frå filosofi har han skrive fleire vitskaplege artiklar om poetane Olav H. Hauge og Kjartan Hatløy. Han har òg vore medredaktør for forskingsantologiane «Å verte vâr verda att. Åtte tekstar om lyrikk» (2020), «Om det menneskelege og det ikkje-menneskelege. Ti tekstar om lyrikk» (2023) og «Her må då ordi koma: Nye lesingar i Olav H. Hauges dikting» (2024).

• Årets festspelprogram